汪明荃（阿姐）将于11月举行红馆演唱会，近日积极为个唱宣传，日前为陈志云YouTube频道担任嘉宾，访问足足长达一小时。期间，陈志云提到有网民指汪明荃阻住后生仔女上位，汪明荃显得愕然并否认，指每个年纪都有各自做到嘅嘢。

访问中，陈志云问到汪明荃有无考虑退休，汪明荃直言有时攰得滞嘅时候都会想抖下，但都係休息一阵，表示想学以致用：「我学咗咁多嘢，我如果唔做咪嘥晒，做咩嘥咁多时间去学啫？而且我想证明每一个年龄都可以做啲唔同嘅嘢。」陈志云就读出网民留言：「呢度（留言区）都有人话『哎呀，好心畀啲后生嘅做啦』。」汪明荃则回应指自己唔会阻住年轻人：「我冇阻住到佢哋喎，后生嘅又做唔到老㗎。」续指：「係因为佢自己个样生得老积稳重呀嘛！有啲（演老年角色）假到死，我会阻住边个啫？唔会㗎，老嗰啲同我一齐老㗎啦。」

及后，汪明荃透露饰演1980年剧集《京华春梦》时嘅年龄：「我谂都係40几岁啦！（实为33岁）」，令陈志云笑言：「你咪阻住啰，40几岁做10几岁」，汪明荃回应指其实自己40几岁先啱啱学识做戏，认为经验需要时间累积：「你估而家港姐啊？18岁就做」，更表示而家好多年轻人经验不足：「而家（入行）即刻叫佢哋做戏、做主持，你乜嘢都未学。」汪明荃嘅言论引起网民讨论，部分网民认为汪明荃应该要退落嚟：「唔好徙钱睇佢，唱尼唱去得嗰只，埋尾重要搵番旧」、「阿姐应该一早就要退休啦，你仲话开演唱会」、「记忆力差了，国语又唔识讲！人生都77啦，仲咁唔化！志云讲得啱吖」等等，不过都有部分网民表示欣赏汪明荃，指佢係香港娱乐圈嘅典範：「汪亚姐十年如一日的真诚，一点没变」、「阿姐红足一世，永不与时代脱节，与时并进，并不俗套。欣赏她的努力和认真」、「阿姐好靓、好有智慧」、「我由3岁至今都咁锺意阿姐！又靓又敬业好值得尊敬！」、「欣赏她的专业」等等。

按此下载全新 APP，睇尽最新娱乐新闻、乐坛消息、名人热话、热门电影、Netflix剧评，新人更可换领限量新人礼，立即下载！