演艺圈幕前艺员固然重要，但一班幕后工作人员亦不容忽视。不过，近日一班网民就喺讨论区讨论TVB嘅招聘幕后人员广告，发现其薪水待遇极差，有网民留意到有职位足足两年仍未能成功请到人，搞到招聘广告无限loop。

有网民于讨论区发文，列出多个TVB嘅招聘幕后人员广告，包括邮务助理、视像设计师、宣传主任、场务、摄影师、字幕操作员、新闻资料室文员，以及初级创作撰稿员等等，人工介乎每月$10,000至$20,000，每周工作5日或6日，部分职位採用24小时轮班制，亦列明间中需要超时工作。有唔少网民留言指TVB出手低，表示喺出面做保安仲多钱过佢：「咁样返个看更都仲高人工过佢啦」、「好辛苦 咁样返法」、「FG价，仲要shift，返六日」、「躺平拎综缓好过」、「谭仔阿姐人工高佢60%，仲要唔驶24小时轮班」、「人工低待遇差，边个做」等等。虽然唔少网民都话人工低，但楼主就表示应该係几千人争一个位，认为TVB可能对应徵者要求好高：「可能又係嫌求职者癞蛤蟆／拣极都拣唔到先搞到要无限loop（差唔多loop左两年）？因为人工再低都一定大把人争住做」，又有网民指以前唔少人为追星都会入去做广播助理，亦有人认为想入媒体行业嘅人想做TVB都唔出奇：「做得媒体，都係为追梦，香港得几间电视台，无线最大，最多资源 想学野，一定係去无线」。不过，楼主亦估计有机会TVB一早内定好空缺职位嘅人选，刊登招聘广告只係人事部职员交差，扮请人。

按此下载全新 APP，睇尽最新娱乐新闻、乐坛消息、名人热话、热门电影、Netflix剧评，新人更可换领限量新人礼，立即下载！